CV-gaagu waa fursadaada ugu horeysa ee aad ku soo jiidan karto, kuna saamayn karto shaqo-bixiyaha mustaqbalka (employer).
CV-ga (Taariikh nololeedka shaqo-doonka) oo si wanaagsan loo diyaaro, farsamooyin qurux bandanna lagu naqshadeeyo wuxuu sahlayaa, si weynna u kordhin karaa fursada aad ugu gudbi karto marxalada labaad ee qiimaynta ama waraysiga shaqo (Interviews) iyo ugu dambayn in aad hanato shaqada aad ku haminayso.
Tilmaamahan, waxaanu kugula wadaagi doonaa habab kala duwan oo muhim ah iyo talooyin dhamaystiran oo ku saabsan qorista CV saameyn leh oo si wanaagsan u muujinaya xirfadahaaga, waayo-aragnimadaada, iyo guulahaaga.
Dooro qaabka (Format-ka) saxda ah:
- Adeegso qaabayn muuqanaysa, xirfadaysan, oo leh cinwaano qoraalkoodu muuqdo iyo iyo qodobo muhiim ah si aad CV-gaaga uga dhigto mid sahlan oo la akhrin karo.
- Isticmaal qaabka ugu fudud uguna sahlan si aad u muujiso khibradaada shaqo, xirfadahaaga, kartidaada iyo aqoontaada (shahaadooyinkaaga).
Waafaji CV-gaaga Shaqada aad Codsanayso:
- Waafaji CV-gaaga shaqooyinka aad codsanayso adigoo si gaar ah u muujinaya xirfadaha iyo waayo-aragnimadaada la xiriira shuruudaha shaqadaas.
- Isticmaal ereyada muhiimka ah ee lagu sheegay faahfaahinta shaqada si aad u muujiso inaad ku habboon tahay booskaas.
Muuji Ujeedada Iyo Himilooyinkaaga Gaarka ah:
- Ku bilow CV-gaaga soo koobid hordhac ah ama qoraal kooban oo aad ku muujinayso ujeedada, taariikhdaada shaqo iyo himilooyinkaaga mustaqbal.
- U diyaari qaybtan si aad u soo jiidato dareenka shaqo bixiyaha kuna muuji xirfadahaaga gaarka ah iyo waxyaabaha muhimka ah ee aad soo kordhin doonto hadii aad booskan ku guulaysato.
Muuji Guulahaaga:
- Halkii aad tixi lahayd ama aad liis-gareyn lahayd waajibaadka shaqadaada, diiradda saar oo muuji guulahaaga qaabka ugu haboon ee suurtagalka ah.
- Bixi tusaalooyin gaar ah oo muujinaya sida aad muhimka ugu ahayd shaqooyinkii hore iyo sida ay kuugu suurtagashay guulaha aad ka gaadhay waajibaadkaaga shaqo.
Bandhig Xirfadahaaga:
- Samee qayb goonni ah oo aad ku soo bandhigeyso xirfadahaaga muhiimka ah iyo  farsamooyinkaaga guud.
- U qaabee xirfadahaaga si waafaqsan kuna haboon shuruudaha shaqada aad codsanayso.
Soo Koob oo Waafaji Mowduuca:
- Ku soo koob CV-gaaga hal bog haddii aad tahay qof bilow ah ama heerka dhexe ah, iyo ugu badnaan laba bog haddii aad tahay khabiir sare.
- Kaliya ku muuji macluumaadka khuseeya shaqada aad codsanayso.
Adeegso Erayo Muujinaya Waxqabad iyo Luuqad Awood Leh:
- Qodobadaada ku bilow erayo soo jiidasho leh oo xooggan oo lagu sharaxayo guulahaaga iyo waajibaadkaaga.
- Adeegso luuqad awood leh oo muujinaysa kalsooni iyo xirfad waayo-aragnimo.
Dib-u-Eegis iyo Tafatir:
- Hubi in qoraalka CV-gaagu uusan lahayn qaladaadka higgaada iyo naxwaha.
- Weydii saaxiibkaa ama la-taliyahaaga inuu dib u eego CV-gaaga oo uu ku siiyo talo ka hor intaadan gudbin.
CV-ga oo si wanaagsan loo diyaariyo wuxuu lagama maarmaan u yahay raadinta shaqooyinka. Adigoo raacaya talooyinkan iyo tilmaamahan aanu kor ku soo xusnay, waxaad abuuri kartaa CV si hufan u muujinaya aqoontaada iyo waayo-aragnimadaada, taas oo kaa caawinaysa inaad ka dhex muuqato shaqo bixiyayaasha. Xusuusnow inaad si joogto ah u cusbooneysiiso oo u hagaajiso CV-gaaga si uu ula jaanqaado yoolalashaada shaqo islamarkaana aad uga muuqato uguna tartanto suuqa shaqada.
W/Q: Omarkad Ahmed